अब काठमाडौं उपत्यकामा तीव्र रुपमा सवारीसाधन चलाउने चालकले अब अनिवार्य रुपमा सचेतना कक्षा लिनुपर्ने भएको छ । त्यसका साथै नियमानुसार जरिवाना तिर्नुपर्नेछ । आउँदो मङ्सिर १५ गतेदेखि उक्त नियम लागू हुने काठमाडौं उपत्यका ट्राफिक प्रहरी कार्यालयले जनाएको छ ।

यसअघि मापसे गरेर सवारी चलाउनेलगायत विभिन्न ट्राफिक नियम उल्लङ्घन गर्नेले कक्षा लिनुपर्ने व्यवस्था थियो । अब भने तीव्र गतिमा चलाउनेले पनि अनिवार्य रुपमा एक घण्टाको ट्राफिक कक्षा लिनुपर्ने कार्यालयका प्रवक्ता एवं प्रहरी वरिष्ठ उपरीक्षक राजेन्द्रप्रसाद भट्टले जानकारी दिएका छन् ।

अहिलेसम्म मापसे गरेर सवारीसाधन चलाउने, लेन नियम उल्लङ्घन गर्ने र रातो बत्ती क्रस गरेमा नियमअनुसार कारबाही गरी अनिवार्य रुपमा सचेतना कक्षा लिनुपर्ने व्यवस्था थियो ।

काठमाडौं उपत्यकामा हुने सवारी दुर्घटनाको मुख्य कारण तीव्र गतिमा सवारीसाधन चलाउनु रहेको देखिएको एसएसपी भट्टको भनाइ छ । तीव्र गतिका कारण हुने दुर्घटनामा मानवीय क्षति बढी हुने गर्दछ । आव २०७८/७९ मा तीन हजार पाँच सय ४३ र चालु आवको तीन महिनाको ६ सय ४९ सवारी दुर्घटना तीव्र गतिका कारण भएको पाइएको छ ।

यस प्रकारका दुर्घटना नियन्त्रणका लागि काठमाडौं उपत्यका ट्राफिक प्रहरी कार्यालयबाट सवारीसाधनको गति जाँच अभियानलाई तीव्रता दिइएको छ । यसरी तीव्र गतिमा सवारीसाधन चलाउने चालकलाई आव २०७८/७९ मा १८ हजार चार सय ४७ र चालु आवको तीन महिनामा आठ हजार पाँच सय ८४ जनालाई उक्त कसुरमा कारबाही गरिएको छ । तर सवारी चालकमा सचेतनाको कमीले गर्दा तीव्र गतिमा सवारीसाधन चलाउने प्रवृतिमा कमी नआएको र दुर्घटना बढ्दै गएको प्रहरीको निष्कर्ष छ ।