टोकियो महानगरीय प्रहरी विभाग र एनआरएनए जापानको संयुक्त आयोजना

• ^{_{विशेष प्रतिनिधि, टोकियो (जापान)}}

प्राकृतिक प्रकोप आइपरेको समयमा तत्काल बच्नका लागि अपनाउनु पर्ने उपायका बारेमा सचेतना जनाउनका लागि जापानको टोकियोमा प्राकृतिक प्रकोप पूर्वतयारी अभ्यास हुने भएको छ ।

टोकियो महानगरीय प्रहरी विभाग आयोजक र एनआरएनए जापान सहआयोजक रहने गरि अगस्ट ३१ तारिख टोकियोको नाकानोस्थित सिकिनो मोरी पार्कमा उक्त अभ्यास गरिन लागेको एनआरएनए जापानकी उपाध्यक्ष डा. एलिजा केसी भण्डारीले जानकारी दिइन् ।

प्राकृतिक प्रकोपबाट हुने जोखिमलाई न्यूनीकरण गर्दै तत्काल त्यस्तो अवस्थामा अपनाउनुपर्ने बारेमा सचेतना दिनका लागि स्टाम्प ऱ्यालीसहितको पूर्वतयारीको अभ्यास सो दिन बिहान ९ः३० बजेदेखि १ बजेसम्म गरिन लागेको उनले बताइन् ।

‘भूकम्प ज़स्तो प्राकृतिक प्रकोपको जोखिम उच्च रहेको जापानमा भूकम्पका बेला के कस्तो पूर्वतयारी गर्नुपर्छ के–कसरी बच्नुपर्छ त्यस बारेमा जानकारी गराइने छ’, उपाध्यक्ष केसी भण्डारीले भनिन्– भर्चुअल रियलिटीबाट भूकम्प आउँदा कस्तो महसूस हुन्छ भन्ने कुरालाई हेर्न सकिने भएकोले कार्यक्रममा सहभागिताको लागि अनुरोध छ ।’

जापान प्रहरीसंगको सहकार्यमा कार्यक्रम गरिन लागेको र यसले प्राकृतिक प्रकोपको सचेतनाका साथै जापान र नेपालको दौत्य सम्बन्धलाई थप मजबुत बनाउन सहयोगीको भूमिका निर्वाह गर्ने विश्वास एनआरएनए जापानका अध्यक्ष नवीन निउरेले बताए । कार्यक्रम उपयोगी र सचेतनामूलक रहनुका साथै स्टाम्प ऱ्यालीमा सहभागिता जनाउनेलाई उपहार पनि प्रदान गरिने भएकोले सहभागिताका लागि जापानबासी नेपाली समुदायलाई एनआरएनए जापानका महासचिब टिकाराम खरेलले अनुरोध गरेका छन् ।