बाँकेको शमशेरगञ्जमा रोकिराखेको एक ट्रकमा बस ठोक्किँदा सात जनाको मृत्यु भएको छ । दाङबाट बर्दियातर्फ गइरहेको ना ७ ख २३२१ नम्बरको बस रोकिराखेको ना ८ ख ६४०५ नम्बरको ट्रकमा ठोक्किएर दुर्घटना भएको हो ।

शुक्रबार राति ९ बजे भएको दुर्घटनामा सात जनाको मृत्यु भएको र करिव दुई दर्जन यात्रु घाइते भएको जिल्ला प्रहरी कार्यालय बाँकेले जानकारी दिएको छ । घाइतेमध्ये दुई जनाको अवस्था गम्भीर छ ।

डिएस्पी नारायण डाँगीले जानकारी दिएअनुसार उक्त दुर्घटनामा ठाकुरबाबा-७ का ६५ वर्षीय साधुराम थारु, ठाकुरबाबा-९ का ५० वर्षीय कांशिराम थारु, ५५ वर्षीया कस्तुरी थापा, ५० वर्षीया रुपा परियार, ४० वर्षीया जयन्ती थारु, ठाकुरबाबा-८ का ४५ वर्षीय जुगबहादुर चन्द र पहिचान नखुलेका अर्का एक युवकको मृत्यु भएको छ ।

मृतकमध्ये जुगबहादुर चन्द बसचालक रहेका र सनाखत नभएका व्यक्ति बसकै स्टाफ भएको प्रहरीको भनाइ छ । बताइएअनुसार दुर्घटनामा परेको सो बसमा ४१ जना यात्रु सवार रहेका थिए । घाइतेको कोहलपुरस्थित अस्पतालमा उपचार भइरहेको छ ।

प्रहरीले जनाएअनुसार दाङबाट बर्दियातर्फ फर्कंदै गरेको ठाकुरबाबास्थित बेतनी सामुदायिक वन उपभोक्ता समूहको टोली दुर्घटनामा परेका हुन् ।