पाकिस्तानको अदालतले पूर्वप्रधानमन्त्री इमरान खानलाई आधिकारिक गोप्य खुलासा गरेको दोषी ठहर गर्दै १० वर्षको कठोर कारागार सजाय सुनाएको छ । मंगलबार सुनाइएको यस फैसलापछि खानका समर्थकहरूले कैदमा परेका राजनीतिज्ञलाई संसदीय निर्वाचनको केही दिनअघि यसरी किनारा लगाइएको प्रतिक्रिया दिएका छन् ।

सन् २०२२ मा अविश्वासको मतबाट अपदस्थ गरिएका खान पहिलादेखि नै तीन वर्षको कारागार सजाय काटिरहेकाले निर्वाचनमा उम्मेदवार बन्नबाट बञ्चित छन् । उनीविरुद्ध एक सय ५० भन्दा धेरै अन्य मुद्दा अझै विचाराधीन छन् । तैपनि पूर्वक्रिकेट स्टार आफ्नो तल्लो तहमाथि पकड र सत्ताविरोधी वयानबाजीका कारण शक्तिशाली राजनीतिक शक्ति बनेका छन् ।

गत वर्ष खानको गिरफ्तारीपछि पाकिस्तानमा हिंसात्मक प्रदर्शन भए पनि अधिकारीहरूले त्यतिबेलादेखि इस्लामवादी राजनीतिज्ञका समर्थक र पार्टीमाथि करवाही गरेका छन् । यसबाट उनीहरू नयाँ ऱ्यालीहरू आयोजना गर्न सावधान भएका छन् ।

आर्थिक सङ्कटमा फसेको संवेदनशील समयमा पाकिस्तानमा फेब्रुअरी ८ मा निर्वाचन हुँदैछ । आर्थिक सङ्कटलाई व्यवस्थापन गर्न खानका उत्तराधिकारी शहबाज शरिफले सङ्घर्ष गर्नुपरेको थियो । शरिफले ग्यास र बिजुलीको करमा पर्याप्त वृद्धिमा सहमत भएरमात्र अन्तर्राष्ट्रिय मुद्राकोषबाट जमानत राशि प्राप्त गर्न सकेका थिए । यसबाट दैनिक उपभोग्य वस्तुहरूमा चिन्ताजनक ढंगले मूल्य वृद्धि भयो र उनको पार्टी अलोकप्रिय बनेको छ ।

मङ्गलबार खानलाई साइफर मामिलाको नामले प्रख्यात मुद्दामा दोषी ठहर गरिएको थियो । उक्त मुद्दामा उनमाथि एक ऱ्यालीमा एउटा गोपनीय दस्तावेज फुकाएर राज्यको गोप्य कुराहरू खुलासा गरेको आरोप लगाइएको थियो । दस्तावेजलाई सार्वजनिक गरिएको छैन तर वासिङ्टनमा पाकिस्तानी राजदूत र इस्लामाबादमा विदेश मन्त्रालयबिच भएको कूटनीतिक पत्राचार भएको मानिएको छ ।

पूर्वप्रधानमन्त्री खानले दस्तावेज आफूलाई धम्की दिइँदै आएको प्रमाण भएको दाबी गर्दै आफ्नो निष्कासन कथितरूपमा पाकिस्तानमा सेना र सरकारले कार्यान्वयन गरेको अमेरिकी षड्यन्त्र भएको बताएका छन् । अमेरिकी र पाकिस्तानी अधिकारीहरूले उक्त दाबीको खण्डन गरेका छन् ।