मुगाको माला, टल्कने पत्थरलगायतका बहुमुल्य बस्तु ठगी गरेको आरोपमा गोरखाका दुई जना कपिलबस्तुका एक गरी तीन युवालाई प्रहरीले नियन्त्रणमा लिएको छ । पक्राउ पर्नेमा गोरखा नगरपालिका-३ नारेश्वरका २३ वर्षीय अश्विन दानी, भीमसेन थापा गाउँपालिका-८ का २५ वर्षीय अर्जुन कुमाल र कपिलवस्तुका २७ वर्षीय इमान सिं सुनाररहेको जिल्ला प्रहरी कार्यालय नुवाकोटले जनाएको छ ।

कार्यालयका निमित्त प्रमुख डिएसपी खगेन्द्रबहादुर खड्काका अनुसार गत फागुन ३० गते मुगामाला र टल्कने पत्थर किन्न भन्दै उनीहरु नुवाकोटको बिदुर नगरपालिका-७ महादेवखर्कस्थित चन्द्रबहादुर तामाङको घरमा पुगेका थिए । उनीहरुले घर पुगेर सामान हेरेछन्, ३५ लाखमा किन्ने फाइनल डिल पनि भएछ, तर अन्तमा पैसा नदिइ सामान लिएर भागेछन् । घटनाबारे तामाङले प्रहरीमा खबर गरेपछि प्रहरीले उनीहरुको खोजी कार्य तीव्र पारेको थियो ।

फोन ट्रयाकको आधारमा काठमाडौंको वालुवाटारमा लुकेर बसेको जानकारी मिलेपछि उनीहरु लुकेको कोठाबाट तीनै जनालाई पक्राउ गरिएको डिएसपी खड्काले जानकारी दिए ।

ठगी गरेको सामानसहित उनीहरुलाई पक्राउ गरिएको डिएसपी खड्काको भनाइ छ । उनीहरुको साथबाट ठगी गरेको मुगा माला चार थान, सि माला दुई थान, आर माला र टल्कने पत्थर नौ थान समेत बरामद भएको उनले जानकारी दिए । उनीहरुविरुद्ध ठगी मुद्दा दर्ता भइ आवश्यक अनुसन्धान भइरहेको जिल्ला प्रहरी कार्यालय नुवाकोटले जनाएको छ ।