राजधानीमा बन्न लागेको एक बाल अस्पताललाई संघीय संसद सदस्य डा. सुनिल शर्माले २० लाख रुपैयाँ आर्थिक सहयोग गरेका छन् । डा. भगवान कोइरालाको अगुवाइमा निर्माण हुन लागेको अस्पताललाई सांसद शर्माले उक्त सहयोग गरेका हुन् ।

स्वास्थ्य व्यवसायीसमेत रहेका डा. शर्माले वरिष्ठ मुटु रोग विशेषज्ञ डा. कोइरालाको अगुवाइमा हेपाली हाइटमा रहेको निर्माणाधीन अस्पताल काठमाडौं इन्स्टिच्युट अफ चाइल्ड हेल्थ (कियोच) मा पुगेर सो रकम सहयोग गरेका हुन् ।

रकम हस्तान्तरण गर्दै डा. शर्माले राज्यले गर्नुपर्ने काम डा. कोइराला आफैले गर्न लाग्नुभएको देखेर उहाँको सम्मानस्वरुप आफूले सहयोग गरेको बताए ।

डा. कोइराला अध्यक्ष रहेको (कियोच) ले काठमाडौंसँगै सातै प्रदेशमा विशिष्टीकृत बाल अस्पताल निर्माण परियोजना अगाडि बढाएको छ । गैरनाफामूलक अस्पताल स्थापना गर्ने लक्ष्य लिएको कियोचको दमकमा भने निर्माण सम्पन्न भइ अस्पतालले सेवा शुरु गरिसकेको छ ।

कियोचले राजधानीमा एक सय शय्याको अस्पताल निर्माण गर्ने बताइएको छ । त्यसपछि सातवटै प्रदेशमा ५० शैय्याको अस्पताल स्थापना गर्ने डा. कोइरालाले जानकारी दिए ।