राष्ट्रपति भ्लादिमिर पुटिनले आफ्नो आणविक शक्तिहरू सधैँ ‘सतर्क’ रहेको भन्दै रुसले पश्चिमबाट आउने कुनै पनि धम्कीलाई सहन नसक्ने चेतावनी दिएका छन् ।

औपचारिक पोशाकमा सजिएका हजारौँ सैनिकसामु बिहीबार रेड स्क्वायरमा एक सम्बोधनमा उनले युक्रेनमा लडिरहेका आफ्नो सेनाको प्रशंसा गरे र ‘पश्चिमी सम्भ्रान्तहरू’लाई विश्वभर द्वन्द्व फैलाएको आरोप लगाए । ‘रुसले विश्वव्यापी द्वन्द्व रोक्न सबै कुरा गर्नेछ तर यही समयमा हामीलाई धम्की दिन कसैलाई पनि अनुमति दिनेछैनौँ, हाम्रा रणनीतिक शक्तिहरू सधैँ सतर्क छन्’, विजय दिवस परेडलाई सम्बोधन गर्दै पुटिनले भने, ‘प्रिय साथीहरू, रुस अहिले कठिन र निर्णायक अवधिबाट गुज्रिरहेको छ, मातृभूमिको भाग्य, यसको भविष्य हामी प्रत्येकमा निर्भर गर्दछ ।’

मे ९ को परेड दोस्रो विश्वयुद्धमा सोभियत सङ्घमा नाजी जर्मनीको हारको प्रतीक हुनुका साथै पुटिनले मुलुकलाई युद्धस्तरमा बलियोसँग अगाडि बढाइरहेकाले रुसमा यो दिन सबैभन्दा महत्त्वपूर्ण सार्वजनिक बिदा मानिएको छ । रुसी राष्ट्रपतिले बारम्बार युक्रेनविरुद्धको हालको लडाइँलाई ‘नाजीवाद’ विरुद्ध अस्तित्वको लडाइँका रूपमा प्रस्तुत गरेका छन् । उनले आफ्नो आणविक अभिव्यक्तिलाई पनि बढाएका छन् । यसै साताको सुरुमा उनले रुसी सेनालाई युक्रेननजिकै रहेको नौसेना र सैनिकहरू सम्मिलित आणविक हतियार अभ्यासन गर्न आदेश दिए ।

गत वर्ष रुसले व्यापक आणविक परीक्षण प्रतिबन्ध सन्धिको अनुमोदनलाई त्याग्यो र संयुक्त राज्य अमेरिकासँगको प्रमुख हतियार कटौती सम्झौताबाट बाहिरियो ।

रेड स्क्वायरमा आयोजना गरिने विजय दिवस परेडमा उन्नत मिसाइल र वायु रक्षा प्रणालीसहत रुसी सैन्य उपकरणहरूको स्तम्भका साथै हजारौँ सैनिक सहभागी हुन्छन् । रुसले प्राय ‘मैत्रीपूर्ण’ ठानेका मुलुकका प्रतिनिधिहरूलाई यो कार्यक्रममा आमन्त्रित गर्दछ । यद्यपि पश्चिमसँगको गतिरोधका बीच सन् २०२२ को प्रारम्भमा युक्रेनमा सेना पठाउनुअघि नै प्रतिनिधिहरूको उपस्थिति कम भएको छ ।

रुसी राज्य मिडियाले क्रेमलिनका एक सहयोगीलाई उद्धृत गर्दै बिहीबारको परेडमा आठ विश्वनेता सहभागी हुन लागेको यसै साता बताएको थियो । तिनीहरूमा पाँच पूर्वसोभियत मुलुक बेलारुस, कजाकिस्तान, किर्गिस्तान, ताजिकिस्तान र तुर्कमेनिस्तानका साथै क्युबा, लाओस र गिनी-बिसाउका नेताहरू छन् ।

पुटिनको विजय दिवसको सम्बोधन उनको सेनाले युक्रेनमा प्रगति हासिल गरेको र आफ्नो अभूतपूर्व पाँचौँ कार्यकालको सपथ लिनेबित्तिकै आएको छ । एकहत्तर वर्षीय क्रेमलिन प्रमुखले यस शताब्दीको प्रारम्भदेखि नै रुसमा शासन गरेका छन् । उनले मार्चमा सबै विपक्षीहरूबिना राष्ट्रपति निर्वाचन जितेपछि ६ वर्षका लागि नयाँ जनादेश प्राप्त गरेका छन् ।

^{_{photo afp}}