स्लोभाक प्रधानमन्त्री रोबर्ट फिकोको अवस्था स्थिर तर अहिले पनि ‘अत्यन्त चिन्ताजनक’ रहेको उनका उपप्रमुखले बिहीबार बताएका छन् । अधिकारीहरूले फिकोको जीवन बचाउने प्रयास गरेको एक दिनपछि शान्त रहन र युरोपेली सङ्घ (इयु)को निर्वाचन अभियान निलम्बन गर्न आग्रह गरेका छन् ।

सरकारले ‘राजनीतिक हमला’ नाम दिएको गोलीबारीले युरोपेली संसद् निर्वाचनको केही साताअघि बढ्दो ध्रुवीकरण वा त्योभन्दा धेरै हिंसाको आशङ्का उत्पन्न गरेको बताइएको छ । स्लोभाकियाको राजनीति वर्षौंदेखि युरोपसमर्थक र राष्ट्रवादी झुकाव खेमाबीच विभाजित छ । पछिल्लो निर्वाचन गलत सूचना, आपसी आरोप र सामजिक सञ्जालमा आक्रमणबाट प्रभावित भएको छ ।

स्लोभाकियाका नवनिर्वाचित राष्ट्रपति पिटर पेलेग्रिनीले पत्रकारहरूसँग भनेका छन्, ‘म स्लोभाकियाका सबै राजनीतिक दललाई उनीहरूको युरोपेली निर्वाचन अभियानलाई अस्थायीरूपमा निलम्बन गर्न वा अत्यन्त कम गर्न आह्वान गर्दछु ।’

ज्ञात रहोस्, गोली लागेपछि ५९ वर्षीय प्रधानमन्त्री फिकोलाई बचाउन सङ्घर्ष गर्दै सर्जनहरूले अपरेसन थिएटरमा धेरै घन्टा बिताएका छन् । बैठकपछि जनताका सदस्यहरूसँग कुराकानी गरिरहँदा उनमाथि गोली प्रहार भएको थियो । चिकित्सकहरूले फिकोको अवस्था स्थिर बनाएको भन्दै उपप्रधानमन्त्री रोबर्ट कलिनकले भनेका छन्, ‘तर दुर्भाग्यवश चोटहरू जटिल भएकाले उहाँको अवस्था अहिले पनि अत्यन्त गम्भीर छ ।’