‘एन.डी. प्रकाश र उहाँका डायरी’को विमोचन

नेपाली काङ्ग्रेसका सभापति एवम् पूर्व प्रधानमन्त्री शेरबहादुर देउवाले धनगढी विमानस्थलको नामाकरण काङग्रेसका दिवंगत नेता एन.डी. प्रकाश चटौतको नाममा गर्न पहल गर्ने बताउनुभएको छ । एन.डी. प्रकाश (नारायणीदत्त चटौत)को ९५औं जन्मजयन्तिको अवसरमा प्रकाशित ‘एन.डी. प्रकाश र उहाँका डायरी’ नामक पुस्तको विमोचन कार्यक्रममा सभापति देउवाले सो प्रतिवद्धता जनाउनुभएको हो ।

एन.डी.को नाममा धनगढी विमानस्थलको नामाकरण गर्न वरिष्ठ पत्रकार हरिहर बिरहीद्वारा राखिएको प्रस्तावप्रति सहमति जनाउँदै सभापति देउवाले भन्नुभयो- ‘यसका लागि सरकारसँग पहल गर्नेछु, तत्काल भएन भने पनि म प्रधानमन्त्री भएको बेला यो निर्णय गर्नेछु ।’

प्रजातन्त्रका लागि जीवन समर्पण गरेका एन. डी. प्रकाश चटौत (वि.सं. १९८७-२०१४) १८/१९ वर्षको उमेरमै आफ्नो पढाइ, भविष्य, र परिवारको वास्ता नगरी २००६/०७ सालमा प्रजातान्त्रिक आन्दोलनमा होमिनुभएको थियो । २००७ सालको क्रान्तिताका प्रहरी दमन तथा धरपकडबाट बच्दै उहाँले जनतालाई सङ्गठित गरेर परासीमा क्रान्तिको नेतृत्व गर्नुभएको थियो । भर्खर स्थापना भएको नेपाली काङ्ग्रेसलाई औंला समातेर डोऱ्याउनुपर्ने त्यस समयमा एनडी चटौतले पार्टीको सङ्गठन विकासका लागि निर्वाह गरेको भूमिका उच्च कोटीको थियो । बीपी कोइरालाले उहाँलाई पार्टीका लागि अपरिहार्य पात्र ठानेर नै केन्द्रिय सदस्यको जिम्मेवारी दिनुभएको थियो । नेपालका तत्कालिन राजा त्रिभुवनदेखि भारतका प्रधानमन्त्री जवाहरलाल नेहरुसम्मको दृष्टिमा समेत ‘महत्वपूर्ण व्यक्ति’को रूपमा उचाइ बनाएका युवा एनडीको दुर्भाग्यवश २६ वर्षकै उमेरमा निधन भएको थियो ।

यस्ता ऐतिहासिक व्यक्तित्वद्वारा दैनन्दिन आफ्नै हस्तलिपीमा टिपिएका दैनिकीलाई डा. भुवनेश्वरीदत्त चटौतले सङ्कलन गरी श्रीमती मञ्जुदेवी चटौतले प्रकाशन गर्नुभएको पुस्तक ‘एन.डी. प्रकाश र उहाँका डायरी’ मंगलबार राजधानीमा विमोचन गरिएको हो । सात सय पृष्ठको अति नै गहकिलो र स्तरीय पुस्तक प्रकाशनमा ल्याउन वरिष्ठ पत्रकार हरिहर बिरही, भरत कोइराला, श्याम अधिकारी, हरि मञ्जुश्रीको अहम् भूमिका रहेको विमोचनका क्रममा बताइयो ।

ऐतिहासिक महत्वको दस्तावेज बन्न सक्ने सो पुस्तकको विमोचन समारोहमा प्रमुख अतिथि रहनुभएको शेरबहादुर देउवाका अलावा वरिष्ठ पत्रकार हरिहर बिरही, इतिहासकारद्वय रमेश ढुङ्गेल र राजेश गौतम, पूर्वमन्त्री एवम् नेपाली काङ्ग्रेसका नेताद्वय तारिणीदत्त चटौत र एनपी साउदले स्वर्गीय एनडी चटौतको ऐतिहासिक कर्म र जीवनीबारे प्रकाश पारेका थिए । गौशालास्थित होटल क्रिष्टल पशुपतिमा आयोजित उक्त कार्यक्रममा भरत कोइरालाले स्वागत मन्तव्य दिएका थिए भने अनिता बिन्दुले कार्यक्रम सञ्चालन गरेकी थिइन् ।