झापा जिल्ला अदालतले विर्तामोड नगरपालिकाका निवर्तमान नगरप्रमुख ध्रुव शिवाकोटीलाई जबर्जस्ती करणी अभियोगमा पुर्पक्षका लागि थुनामा राख्ने आदेश दिएको छ ।

जिल्ला न्यायाधीश नविनकुमार जोशीको एकल इजलाशले शिवाकोटीलाई उक्त आदेश जारी गरेको अदालतका सूचना अधिकारी रामचन्द्र बस्नेतले जानकारी दिए । आदेशबमोजिम उनलाई सोमबार नै पुर्पक्षका लागि झापा कारागार चलान गरिएको छ ।

घरेलु कामदारको रुपमा बस्दै आएकी १५ वर्षीया नाबालिकालाई जबर्जस्ती करणी गरेको अभियोगमा गत मङ्सिर २४ गते शिवाकोटीलाई प्रहरीले पक्राउ गरेको थियो ।

पक्राउ परेपछि उनी थुनाकै क्रममा उपचारका लागि विर्तामोडको बीएन्डसी अस्पताल भर्ना भएका थिए । प्रहरीको अनुसन्धान सकिएपछि उनलाई अदालतमा उपस्थित गराइएको थियो । दुई दिनमा बयान सकिएको र थुनछेकको बहसपछि उनलाई पछि ठहरेबमोजिम हुने गरी हाललाई थुनामा राखी पुर्पक्ष गर्ने आदेश भएको हो ।

प्रहरीले पेस गरेको अभियोगपत्रमा अभियुक्त शिवाकोटीमाथि १२ वर्षसम्म कैद सजायको माग दाबी गरिएको छ । उक्त मुद्दाको सुनुवाई अदालतको बन्द इजलासमा भएको थियो ।

ज्ञातव्य छ, एमाले नेता शिवाकोटी गत २०७४ को स्थानीय निर्वाचनबाट बिर्तामोडको मेयरमा निर्वाचित भएका थिए ।

_{^{file photo}}