✍ अनन्तश्री राजगुरु जगतगुरु वीरेन्द्र परम्हंश ज्योतिषाचार्य

आजको पञ्चाङ्ग

श्रीशाके १९४७ नेपाल सं. ११४५ सिद्धार्थीनाम संवत्सर ग्रीष्म ऋतु वि.सं. २०८२ जेठ ५ गते सन् २०२५ मे १९ तारिख सोमबार ज्येष्ठ कृष्णपक्षको सप्तमी तिथि श्रवण नक्षत्र ब्रम्हा योग भद्रा करण आनन्दादिमा सिद्धि योग चन्द्रमा मकर राशिमा भ्रमणशील रहनेछ । काठमाडौंमा सूर्योदय बिहान ५ः१५ मा भयो र सूर्यास्त साँझ १८ः४७ मा हुनेछ ।

आजको राशिफल

मेष – आजको दिन चुनौतीहरू स्वतः हट्नेछन् भने कर्मयोग र आम्दानीले पछ्याउनेछन् । दीर्घकालसम्म लाभ हुने काममा हात हाल्ने समय छ । नयाँ कामको प्रस्ताव आए पनि हिम्मत गर्न नसक्दा केही पछि परिने सम्भावना छ । स्वादिष्ट भोजनमा मन रमाउला । तार्किक क्षमताले मानसम्मान दिलाउन सक्छ । भाग्यले सोचेभन्दा बढी नै फाइदा दिलाउने योग छ । राजनीतिमा रहेकालाई विशेष सफलता मिल्ने सम्भावना छ । इष्टमित्रको सहयोग मिल्नेछ

वृष – सोचेको विशेष काम सफलतापूर्वक सम्पन्न हुने समय छ । परोपकार र धर्मकर्ममा आकर्षण बढ्नेछ । पारिवारिक समस्याको समाधान मिल्नेछ, तर नजिकका साथीभाइ टाढिन सक्ने योग छ । अरूको फाइदाका लागि उपयोग भइएला । विरोधिजनसँगको प्रतिस्पर्धामा केही कमजोर सावित भइएला । यात्रापरक काम बन्नाले उत्साह बढ्नेछ । स्वास्थ्यमा सुधार आउला ।

मिथुन – आजको दिन नसोचेको ठाउँबाट धनलाभ हुने देखिन्छ, तर बाध्यतामा अलमलिनुपर्दा चिताएको काम रोकिन सक्छ । काम बिग्रने डरले सताइरहला । कसैलाई बेसुरमा वचन दिने बानीले आफैलाई कष्टमा पार्न सक्छ, सावधान रहनुहोला । महत्वाकांक्षी योजना गोप्य राख्नु हितकर हुनेछ । व्यवसायमा लगानी बढाउनुपर्ने समय छ । आफ्नै कमजोरीले विवादमा परिने योग रहेकोले सचेत रहनुहोस् ।

कर्कट – कामले अरूको मन लोभ्याउँदै दाम, इनाम र प्रतिष्ठा कमाउने समय छ । सहयोगीहरूले राम्रो फाइदा दिलाउनेछन् । साझेदारीको काम पनि बन्नेछ । धनलाभको सम्भावना छ । परिवारमा आमाको माध्यमबाट काम बन्न सक्छ । समस्यामा साथीभाइको सहयोग प्राप्त हुनेछ । रसरागका क्रियाकलापमा आकर्षण रहला । रमाइलो यात्राको योग रहेको छ, दिन रमाइलैसंग बित्ने देखिन्छ ।

सिंह – विशेष योजनाहरू बन्ने र ठूलै लाभको आश्वासन पनि पाइने समय छ । टाढिएका साथीभाइ नजिकिनाले मन हर्षित रहला । धेरैले तपाईंका कामको तारिफ गर्नाले आत्मविश्वास बढ्नेछ । सबल स्वास्थ्यका लागि मसलाजन्य खानाबाट सावधान रहनु उचित होला । पारिवारिक भेटघाटको योग छ । विशेष व्यक्तित्वलाई भेट्ने मौका जुर्ने देखिन्छ ।

कन्या – मिश्रित फलदायी समय छ । राम्रो कर्मफल प्राप्त हुनाले मन प्रशन्न रहला । सामाजिक क्षेत्रमा नेतृत्व हातलागी हुने योग छ । असंयम व्यवहारले सम्बन्ध बिगार्न सक्छ, बोली र व्यवहारमा सजगता अपनाउनुहोला । बलभन्दा बुद्धिको उपयोग गर्न सक्दा विजयी बनिनेछ । आज अनायसै धन खर्चनुपर्ने आवश्यकता पर्न सक्छ, ध्यान राख्नुहोला । यात्रागत कार्यमा सफलता मिल्नेछ ।

तुला – नियमित कार्यमा सहयोगीहरूले राम्रै साथ दिनेछन् र सोचेजस्तै सफलता मिल्नेछ । पारिवारिक जमघटमा मन रमाउला, तर भेटघाटको अलमलले नोक्सान गर्न सक्छ । प्रतिस्पर्धी परास्त हुनेछन् । अवसर आए पनि मौकामा लाभ उठाउन विशेष प्रयत्नको खाँचो छ । आजको लाभांश सुरक्षित वा सञ्चय नहुन सक्ने योग रहेकोले सजग रहनुहोला । आरोग्यबल बढ्नेछ । यात्रागत कार्यमा सफलता मिल्नेछ ।

वृश्चिक – पराक्रम र उत्साह बढ्ने तथा विशेष योजनामा लगानीको समय छ । प्रतिष्ठित काम गर्ने अवसर प्राप्त होला । उद्योग र व्यापारमा विशेष फाइदाको योग छ, तर अवसरको खोजीमा केही दौडधुप गर्नुपर्ला । विदेश भ्रमणको प्रयासमा हुनुहुन्छ भने प्रयास सार्थक रहला । आफन्तको साथ सहयोगले पराक्रम बढ्नेछ । आरोग्यता रहनेछ । शत्रुपक्ष परास्त हुनेछ ।

धनु – सहयोगीहरूबाट अलिक धोका पाइने सम्भावना रहेपनि विशेष काममा विशिष्ट व्यक्तित्वको सहयोग प्राप्त हुने समय छ । मेहनतले राम्रै लाभ उठाउन सकिनेछ । व्यापारमा पनि राम्रै फाइदाको योग छ । खर्चको मात्रा बढ्ने देखिन्छ, सचेत रहनुहोला । निश्चय भएको काम अचानक बिग्रन सक्ने देखिन्छ, सावधानीको खाँचो छ । बौद्धिक तथा रचनात्मक कार्य बन्नेछ ।।

मकर – लाभ हुने काम प्रारम्भ गर्ने समय छ । गरिएका कामको राम्रै मूल्यांकन होला । साझेदारीमा पनि फाइदा नै मिल्ने देखिन्छ । स्वादिष्ट भोजनको अवसर मिल्नेछ, तर सबल स्वास्थ्यको लागि खानपानमा नियन्त्रण राख्नु उचित हुनेछ । उपहारका नाउँमा बिग्रेको वस्तु हातलागी हुने योग छ । प्राप्त न्यून उपलब्धिले मन बुझाउन नसकिएला । यात्रागत कार्यमा सफलता मिल्नेछ ।

कुम्भ – रोकिएका काम बिस्तारै बन्नेछन् भने नयाँ काम समेत पाइने समय छ । विभिन्न अवसरले पछ्याउनेछन् । बोलीको प्रभाव एवं कार्यसम्पादनको क्षमता बढ्नेछ । अध्ययनमा मन नलागे पनि आत्मविश्वास बढ्नेछ । तर, अनावश्यक वादविवादमा परिने योग रहेकोले सतर्कताको दरकार छ । आफ्नो क्षेत्रमा प्रभुत्व जमाउन सकिनेछ । मिठो भोजन प्राप्त होला । आर्थिक विकाससित सम्बन्धित कार्यमा विशेष सफलता मिल्नेछ ।

मीन – सानो प्रयत्नले पनि राम्रो फाइदा उठाउन सकिने समय छ, तर होसियारीसाथ काम लिनु आवश्यक छ । स्वार्थ वा लाभको पछि लाग्दा साथीभाइ टाढिन सक्छन् । कृषिकर्म र व्यावसायिक काममा राम्रै फाइदा हुनेछ । भूमि, वाहन र पैत्रिक सम्पत्तिले सुख दिलाउने योग छ । मेहनतले कीर्ति दिलाउला । आय वृद्धि हुनेछ । सुख विलास पनि बढ्नेछ ।