पूर्वप्रधानमन्त्री शेरबहादुर देउवाका पुत्र जयवीर देउवालाई सम्पत्ति सुद्धीकरण अनुसन्धान विभागले बयानका लागि उपस्थित हुन सार्वजनिक सूचना जारी गरेको छ ।

विभागद्वारा आज (२३ असार) गोरखापत्रमा सूचना जारी गरी जयवीरलाई बयानका लागि बोलाइएको हो । सूचनामा सात दिनभित्र उपस्थित हुनुपर्ने उल्लेख गरिएको छ ।

विभागले हिजो सोमबार बुढानीलकण्ठस्थित देउवाको क्षतिग्रस्त घरमा समेत जयवीरको नाममा बयानका लागि आउन भन्दै पत्र टाँसेको थियो ।

विभागले टााँस गरेको सूचना–पत्रमा देउवापुत्र जयवीरमाथि सम्पत्ति शुद्धीकरणसम्बन्धी कसुरमा अनुसन्धान चलिरहेको जनाइएको छ ।

जयवीरमाथि नेपाल टेलिकम र पासपोर्टको ठेक्का लगायतमा अनियमिततामा संलग्न रहेको उजुरी परेको र त्यसकै अनुसन्धानका लागि उनको नाममा बयानका लागि पुर्जी काटिएको बुझिएको छ ।

ज्ञातव्य छ, सम्पत्ति शुद्धीकरण अनुसन्धान विभागले यसअघि शेरबहादुर देउवा र श्रीमती आरजु राणा देउवाको नाममा पनि बयानका लागि उपस्थित हुन सूचना जारी गरेको थियो ।