विदेश भ्रमणको सिलसिलामा आफ्नो ओहोदा तथा पदीय मर्यादाको दुरुपयोग गरी मानव तस्करी गरेको अभियोगमा विज्ञान तथा वातावरणमन्त्री विश्वेन्द्र पासवानविरुद्ध अख्तियार दुरुपयोग अनुसन्धान आयोगमा सप्रमाण मुद्दा दर्ता भएको छ । सम्बन्धित सूत्रले जनाएअनुसार मन्त्री पासवान गत मङ्सिरको तेस्रो सातातिर जलवायुसम्बन्धी अन्तर्राष्ट्रियस्तरको सम्मेलनमा भाग लिन ६० जनाको जम्बो टोलीसहित फ्रान्स पुगेका थिए । उक्त कार्यक्रममा दुई दिन सहभागी भएपछि उनी एक हप्तासम्म बेल्जियम, पोर्चुगललगायतका मुलुक पुगेका थिए भने सो क्रममा आफ्नो साथमा लगेका १४ जना युवालाई उनले उतै छोडेर आएका थिए ।
मन्त्री पासवानले भ्रमण दलको लिष्ट बनाउँदा मन्त्रालयका सचिव–उपसचिव तथा अन्य सम्बद्ध अधिकारीसँग मिलोमतो गरी जम्बो टोली बनाएको र उतै बस्न इच्छुक व्यक्तिहरूसँग जनही १६ लाख असुलेर कार्यक्रमसँग सम्बन्ध नै नरहेका व्यक्तिलाई भ्रमण दलमा सामेल गराएका थिए । यतिबेला पोर्चुगलमा शरणार्थी बनी पलायन भएका तिनै १४ मध्येका दुईजना काभ्रेका श्रेष्ठ र तामाङ थरका युवाले काठमाडौंमा रहेका आफ्ना साथीसँग ‘मन्त्री विश्वेन्द्र पासवानलाई १६–१६ लाख दिएर पोर्चुगल आइपुग्यौँ’ भनी बताएको स्रोतले खुलाएको छ । मन्त्री पासवानले मन्त्रालयबाट करिब ६० जना भ्रमण दलका सदस्यहरूको नाममा पनि रकम निकासा गरेको र १४ जनाको उक्त रकमसमेत खाली कागजमा सही गराएर मन्त्रालयका कर्मचारीमार्फत लिएर भागबन्डा गरेको उनीहरूले बताएका छन् ।
स्मरण रहोस्, अध्यागमनको रेकर्डमा उक्त भ्रमण दलका १४ जना सदस्यहरू फर्केको कुनै विवरण छैन । यसरी मानव तस्करी गरेको प्रमाणसहित मन्त्री पासवानको कुकृत्यबारे प्रधानमन्त्री केपी ओलीलाई केही दिनअघि जानकारी गराइएको र प्रधानमन्त्रीले उनलाई बालुवाटार बोलाई एक हप्ताभित्र सप्रमाण स्पष्टीकरण दिन निर्देशन दिएका थिए । तर, त्यतिबेला पासवानले ती १४ जना युवाहरू आफ्नो कामले केही दिन उतै बसेका र उनीहरू छिट्टै फर्कन्छन् भनी प्रधानमन्त्रीलाई आश्वस्त गराउन खोजेका थिए ।
पछिल्लो समाचारअनुसार यही कुरा मिलाउन मन्त्री पासवान हाल पुन: बेल्जियम पुगेका छन् । तर, उनका विरुद्ध पद तथा अख्तियार दुरुपयोग गरी मानव तस्करी गरेको सप्रमाण आरोपसहित अख्तियार दुरुपयोग अनुसन्धान आयोगमा फिराद दर्ता भएको छ ।
स्मरणीय के पनि छ भने सुशील कोइराला प्रधानमन्त्री हुँदा तत्कालीन ऊर्जामन्त्री राधा ज्ञवालीका विरुद्ध निजी कम्पनीहरूलाई हाइड्रो–पावरको लाइसेन्स दिँदा प्रचुर मात्रामा भ्रष्टाचार गरेको आरोपमा प्रमाणसहित अख्तियारमा फिराद दर्ता भएको थियो । सो प्रकरणसम्बद्ध समाचार छापाहरूमा आएपछि सुशील कोइरालाले ऊर्जामन्त्री राधा ज्ञवालीलाई तत्काल पदमुक्त गरेका थिए । कोइराला दिवंगत भइसकेका छन् र यस शोकाकूल घडीमा पनि आमजनताले उनको उक्त कदमलाई निष्ठा र त्यागको रूपमा चर्चा गरिरहेका छन् । अब राष्ट्रियता र निष्ठाको राग अलाप्ने मात्र होइन जनतालाई सुशासन र भ्रष्टचारमुक्त सरकारको प्रत्याभूति दिलाउँछु भनी अभिव्यक्ति दिइरहने प्रधानमन्त्री केपी ओलीले आफ्नो साख बचाउन कस्तो कदम चाल्ने हुन्, सर्वत्र चासोको विषय बन्न पुगेको छ ।
प्रतिक्रिया