उन्नत, सुन्दर र शान्तिप्रिय देश स्विट्जरल्यान्डबारे नसुन्ने को होला ? सम्पत्ति र समय हुनेहरू घुम्नकै लागि विश्वभरबाट स्विट्जरल्यान्ड पुग्ने गर्छन् । यसरी पर्यटनको आनन्द लिन चाहनेका लागि यो सुन्दर मुलुकले अर्को एउटा अवसर प्रदान गरेको छ, पैदल यात्रीका लागि संसारकै सबभन्दा लामो पुल खुलाएर । ‘योरपब्रिज’ नामक उक्त पुलको लम्बाइ १६ सय २० फिट छ भने २ सय ७८ फिटको उचाइमा अवस्थित छ । स्विट्जरल्यान्डको जेरमेट र ग्रेचेन नामक दुई गाउँलाई जोड्ने पुल हेर्दा अत्यन्त विहङ्गम प्रतीत हुन्छ । यस पुलको विशेषता यो पनि छ कि करिब आठ टनको लट्ठा यसमा टाँगिएको छ, जसले पुललाई हल्लिन नदिई पैदल यात्रीको सन्तुलन कायम राख्न सघाउँछ । उक्त पुलको चौडाइ भने जम्मा दुई फिट मात्र रहेको छ ।