यो सम्बन्धनले त्रिविमा भ्रष्टचार हुन्छ भन्ने पुष्टि

त्रिभुवन विश्वविद्यालयले काठमाडौं नेशनल मेडिकल कलेजलाई दिएको सम्बन्धन तत्काल फिर्ता नलिए डा. गोविन्द केसीले १२ औँ अनशन बस्ने चेतावनी दिएका छन । डा. केसी ११ औँ अनशन बसेकै अवस्थामा त्रिविले काठमाडौँ नेशनललाई सम्बन्धन दिएको हो ।

त्रिविले सर्वाेच्च अदालतको आदेशलाई देखाएर २० दिनअघि सम्बन्धन दिएको जनाएको छ । सर्वोच्च अदालतको मानहानी सम्बन्धी परेको मुद्दाका आधारमा त्रिविले सम्बन्धन दिने निर्णय गरेको दाबी गरेको छ । कलेज सञ्चालकले भने शुक्रबार मात्र सम्बन्धन पाएको पत्र बुझेका छ ।

डा. केसीले आफ्नो माग विपरित काठमाडौँ नेशनललाई सम्बन्धन दिएको सूचना पाएपछि त्रिवि पदाधिकारी भ्रष्ट भएको र उनीहरुलाई तत्काल कारबाहीको माग समेत राखेका छन् । उनले भनेका छन्,‘यो सम्बन्धनले उनीहरु भ्रष्ट हुन भन्ने पुष्टि भएको छ, अब सम्बन्धन फिर्ता र त्यसमा संलग्न पदाधिकारीलाई तत्काल कारबाही नभए म १२ औँ अनशन बस्न वाध्य हुनेछु ।’

डा. केसीले बाढीपहिरोले देशमा विषम परिस्थिति उत्पन्न भएको अवस्थामा आफू अनशन बसिरहनु उपयुक्त नभएको भन्दै आफ्नो ११ औँ अनशन २३ दिनपछि स्थगन गरेका थिए ।