चन्द्रकान्त खनाल

रुपन्देही । प्रधानमन्त्री केपी शर्मा ओलीले प्रदेश ५ को प्रदेश प्रदेशसभालाई सम्बोधन गरेका छन् । पहिलोपटक प्रदेशसभालाई सम्बोधन गर्दै प्रधानमन्त्री ओलीले भ्रष्टाचार, अनियमितता र सिन्डीकेट जस्ता अनुचित कुरामा कसैसँग सम्झौता नगर्ने बताए ।

लोकतन्त्रको स्थापनाका लागि गरिएका आन्दोलनले केही समय देश पछाडि परेको भन्दै उनले अब नागरिकलाई आर्थिक रूपले सम्पन्न तथा देश समृद्ध बनाउन अब कुनै पनि कुरामा अल्झिन नहुने बताए ।

तीनवटै सरकारको ध्यान अब आर्थिक विकास र समृद्धिमा लाग्नुपर्ने प्रम ओलीको भनाई थियो । उनले गौतमबुद्धको जन्मस्थल लुम्बिनी भएका कारण यो प्रदेशमा निकै ठूला अवसर रहेको भन्दै अवसरको उपयोग गर्न आग्रह गरे ।

धार्मिक पर्यटन, सांस्कृतिक पर्यटन कृषि, उद्योग, व्यापार लगायतका धेरै सम्भावना प्रदेश ५ मा रहेको बताउँदै प्रधानमन्त्री केपी शर्मा ओलीले यसको योजनाबद्ध विकासमा लाग्न समेत निर्देशन दिए ।

तत्काल आफ्नो श्रोत र साधनले मात्रै सबैखाले विकास गर्न र आर्थिक समृद्धि गर्न सम्भव नभए छिमेकीको सहयोग र सीपको पनि उपयोग गर्न सकिने उल्लेख गर्दै दुवै समान हैसियत भएको बताए । प्रधानमन्त्रीले संविधानले दिएको तीन तहको सरकार गठन गरेपछिको पहिलोपटक संघीय सरकारको प्रधानमन्त्रीको हैसियतमा सम्बोधन गर्न पाउँदा निकै खुसी लागेको अभिव्यक्ति दिए ।

यो खुशी जनतालाई पनि दिलाउने तरिकाले काम अघिबढेको उनको भनाई छ । संघीय संरचनाअनुसारको प्रदेशसभामा पहिलोपटक सम्बोधन गर्न पाएकोमा आफूलाई गर्व लागेको समेत प्रधानमन्त्रीले बताए । अब कुनै पनि नेपाली खान नपाएर भोकै र चिसोले कठ्याङ्ग्रिएर मर्न नपर्ने दोहोऱ्याए ।

आफ्नो लामो सम्बोधनमा उनले प्रतिपक्षतिर इङ्गित गर्दै भने– ‘केही मानिसले सरकार बलियो भयो, तानासाह भयो भनेर आरोपित गर्ने गरेका छन्, त्यो गलत हो ।’
।

प्रधानमन्त्री ओलीबाट आजै अन्तर्राष्ट्रिय बौद्ध सम्मेलन तथा २५६२औं बुद्ध जयन्तीका अवसरमा लुम्बिनीमा हुने विशेष समारोहलाई सम्बोधन गर्ने कार्यक्रम रहेको छ । उनले १ घन्टा ४ मिनेट प्रदेशसभालाई सम्बोधन गरेका थिए ।