महोत्तरीको लोहारपट्टी गाउँपालिकास्थित महदैया चोकको इदगाहा मस्जिदमा बकर इद मनाउने क्रममा झडप भएको छ ।

नमाज वाचनका लागि मस्जिदमा भेला भएका मुस्लिम धर्मावलम्बीबीच भएको सो झडपमा परी १० जना घाइते भएका छन् ।

झडपले उग्र रूप लिन थालेपछि प्रहरीले हस्तक्षेप गरी नियन्त्रणमा लिएको थियो । प्रहरीले विवाद मिलाउन दुवै पक्षलाई सम्झाउँदा पनि नमानेकाले प्रहरीले दुई राउन्ड अश्रुग्यास प्रहार गर्नुपरेको थियो । घाइतेको उपचार जनकपुर अञ्चल अस्पतालमा भइरहेको बताइएको छ । घाइतेमध्ये दुईको अवस्था गम्भीर रहेको बुझिएको छ । प्रहरीले झडपलार्ई नियन्त्रणमा लिएपछि अहिले स्थिति सामान्य बनेको जनाएको छ ।

नमाज वाचन गर्न दुई पक्षले आ–आफ्ना पण्डित अघि सारेपछि भएको विवाद झडपमा परिणत भएको जिल्ला प्रहरी कार्यालय महोत्तरीले जनाएको छ । झडप बिहान करिब ८ बजेतिर भएको बताइएको छ ।