प्रहरी महानिरीक्षक सर्वेन्द्र खनालले केही प्रहरीका कारण प्रहरी संगठन नै नराम्रो हुन पुगेको भन्दै गल्ती गर्ने प्रहरी अधिकारीलाई कारबाही गरिने बताएका छन् ।

प्रहरी दिवस रनिङ कप पुरुष भलिबल प्रतियोगिताको आज राजधानीमा आयोजित समापन कार्यक्रममा खनालले जनताले प्रहरीप्रति आशा र भरोसा गरेकाले जनचाहनाअनुसार सेवा प्रदान गर्नुपर्ने बताए । ‘संगठनभित्र गल्ती गर्नेलाई कारबाही नगरेसम्म प्रहरी संगठन राम्रो हुँदैन,’ उनले भने ।

महानिरीक्षक खनालले नेपाल प्रहरीको मान, सम्मान, इज्जत प्रतिष्ठालाई अगाडि बढाउन सबैले हातेमालो गरेर काम गर्नुपर्ने बताए । ‘लोभ, लालच नगरी हरेक नागरिकको दिलमा बस्ने गरी काम गर्नुपर्छ,’ उनले भने ।

महानिरीक्षक खनालले प्रहरीभित्रको सञ्चालन हुने खेलकुद गतिविधिलाई सबै प्रदेशमा लैजान आफूले प्रहरी प्रधान कार्यालयबाट गर्नुपर्ने सहयोगका लागि तयार रहेको स्पष्ट पारे । नेपाल प्रहरीमा लागेर खेल खेल्ने खेलाडीको भविष्य उज्ज्वल रहेको उनको भनाइ थियो ।

राष्ट्रिय प्रहरी प्रतिष्ठानका कार्यकारी निर्देशक, प्रहरी अतिरिक्त महानिरीक्षक धीरू बस्न्यातले नेपाल प्रहरीले खेललाई प्राथमिकता दिएको बताए । प्रहरीभित्र खेलाइने खेलले राष्ट्रिय खेलको विकासमा समेत मद्दत पुग्ने उनको भनाइ थियो । असोज १७ देखि सञ्चालन भएको खेल आज सकिएको हो ।

कुल १० टोली रहेको उक्त खेलमा ५ नं. प्रदेश प्रहरी कार्यालय दाङले ३ नं. प्रदेश प्रहरी कार्यालय हेटौँडालाई ३–२ को सेटले हराएको थियो । प्रतियोगिताको प्रथम टिमलाई रु. ५० हजार, प्रमाणपत्र र मेडल, दोस्रो टिमलाई रु. ३५ हजार, प्रमाणपत्र र मेडल तथा सर्वोत्कृष्ट खेलाडीलाई रु. दश हजार नगद प्रदान गरिएको थियो ।