नेपाल कम्युनिस्ट पार्टीका अध्यक्ष पुष्पकमल दाहाल प्रचण्डले पार्टी कार्यालय धुम्बाराहीमा जारी स्थायी कमिटी बैठकमा करिब पौने दुई घन्टा आफ्नो धारणा राखेका छन् । आफ्नो धारणा राख्ने क्रममा प्रचण्डले पार्टी र सरकारलाई सफल बनाउन जारी स्थायी समिटी बैठक ऐतिहासिक भएको बताए । उनले दुई अध्यक्षले संयुक्त रूपमा प्रस्तुत गरेको राजनीतिक प्रतिवेदन पार्टी नेताहरूले दिएको सुझावलाई समेट्दै परिमार्जनसहित पारित गर्नुपर्ने उल्लेख गरे ।

पार्टीबाटै सरकारको आलोचना गर्नुभन्दा सरकारलाई सहयोग गर्नुपर्ने उनको भनाइ छ । यो पार्टी एकता असाधारण भएकोले तल्लो तहसम्मको एकतामा ढिलाइ भएको उनले स्वीकार गरेका छन् । बैठकमा नेताहरूको प्रश्नमा प्रचण्डले पार्टीमा द्विअध्यक्षात्मक प्रणाली नौलो भएकोले यसलाई मिलाएर लैजानुपर्ने बताए । उनले सो अवसरमा पार्टीमा अध्यक्षसमेत रहेका प्रधानमन्त्री केपी शर्मा ओलीलाई सघाउनु आफ्नो जिम्मेवारी रहेको उल्लेख गरे ।

पार्टीमा दुई अध्यक्ष भएपछि कहिलेकाहीँ अप्ठ्यारो अवस्थाको पनि सामना गर्नुपर्ने उनको भनाइ छ । उनले आफू प्रधानमन्त्री केपी शर्मा ओलीसँग असमझदारी बढाउने पक्षमा नरहेको बताएका छन् । उनले भने, ‘कहिलेकाहीँ नखाएको विष पनि लाग्दो रहेछ, तर म प्रधानमन्त्रीसँग असमझदारी बनाएर जान चाहन्नँ ।’

पार्टीभित्र पनि सत्तापक्ष र प्रतिपक्षको अभ्यास भएकोमा असन्तुष्ट बनेका अध्यक्ष प्रचण्डले पार्टी एक भएर सरकारको बचाउ गर्नुपर्ने आसय व्यक्त गरेका थिए ।

आजकै बैठकमा दुवै अध्यक्षले स्थायी कमिटी सदस्यहरूले उठाएका प्रश्नहरूको जवाफ दिने बताइएको भए पनि अध्यक्ष प्रचण्डले बोलेपछि समयाभावका कारण अर्का अध्यक्ष तथा प्रधानमन्त्री ओली भने बोलेनन् । नेकपा स्थायी कमिटीको अर्को बैठक बिहीबार दिउँसो ३ बजे बस्ने कार्यक्रम रहेको छ । सोही बैठकमा प्रधानमन्त्री तथा नेकपाका अध्यक्ष केपी शर्मा ओलीले नेताहरूले उठाएका प्रश्नको जवाफ दिएपछि नेकपाको स्थायी कमिटी बैठक सकिने बताइएको छ ।