जिल्ला प्रहरी कार्यालय कास्कीले प्रतिबन्धित नेपाल कम्युनिष्ट पार्टी कास्कीका नेता, कार्यकर्ता तथा पत्रकारलाई सोमबार साँझ ७ बजे पक्राउ गरेको छ ।

नेत्रविक्रम चन्द ‘विप्लव’ नेतृत्वको नेकपा कास्कीले ७औँ पार्टी पुनर्गठन दिवसको सन्दर्भमा ‘जनसभा’ गरेर फर्कंदै गर्दा बाटोमा प्रहरीले घेरा हालेर सञ्चारकर्मीसहित नेता–कार्यकर्ताहरूलाई पक्राउ गरेको हो ।

नेकपा कास्कीले सोमबार पोखरा महानगरपालिका वडा नं. ३३ देउरालीवस्तीस्थित सुकुम्वासीबस्तीमा कार्यक्रमको आयोजना गरेको थियो । जनसभा भनिएको सो कार्यक्रमलाई नेकपा कास्कीका सेक्रेटरी विश्वासले सम्बोधन गरेका थिए ।

साँझ ७ बजे समाचार संकलन गरेर फर्किंदै गर्दा बाटैमा प्रहरीले स्थानीय सञ्चारकर्मी राजकुमार घिमिरेलाई समेत पक्राउ गरेको बताइएको छ । प्रतिबन्धित नेकपाका अन्य नेता तथा कार्यकर्ता को–को पक्राउ परे भन्ने विषयमा एकिन हुन नसकेको नेकपा कास्कीले जानकारी दिएको छ ।

सञ्चारकेन्द्र डटकमका पोखरा प्रतिनिधि तथा पोखरापाटी डटकमका सञ्चालक समेत रहेका घिमिरेलाई यसअघि पनि पक्राउ गर्दा नेपाल पत्रकार महासंघको मिसन टोलीले पोखरामा प्रहरी प्रशासनसँग छलफल गरी रिहा गरेको थियो ।

प्रतिबन्धित नेकपाको कार्यक्रममा समाचार संकलनका लागि सहभागी हुने पत्रकारमाथि यसअघि पनि सुरक्षाकर्मीले दुःख दिँदै आएका बताइन्छ ।

झण्डै आधा दर्जन पत्रकारहरुलाई विभिन्न स्वार्थ र नियतवश दुःख दिन थालेपछि नेपाल पत्रकार महासंघ केन्द्र र कास्कीका प्रतिनिधिसहितको टोलीले छलफल गरी यो विषय टुङ्ग्याएको थियो ।