नेता पौडेलबाटै पुल उद्घाटन गराइने काङ्ग्रेसको तयारी

निषेधाज्ञा तोडेको आरोपमा बुधबार अपराह्न नियन्त्रणमा लिई दमौली (तनहुँ)स्थित प्रहरी कार्यालयमा राखिएका नेपाली कांग्रेसका वरिष्ठ नेता रामचन्द्र पौडेलको साढे तीन घण्टापछि रिहा गरियो ।

तनहुँको व्यास नगरपालिका-१ र १० जोड्ने बुल्दीखोलामा निर्माण भएको पक्की पुल उद्घाटन गर्न जाने क्रममा निषेधाज्ञा तोडेको आरोपमा अपराह्न २ बजे ‘सुरक्षाका लागि’ भन्दै नेता पौडेललाई प्रहरीले नियन्त्रणमा लिएको थियो । वरिष्ठ नेता पौडेललाई ५ः३० बजे मुक्त गरिएको थियो ।

प्रहरीले वरिष्ठ नेता पौडेल, काङ्ग्रेसका तनहुँ जिल्ला कार्यवाहक सभापति जीतप्रकाश आलेसहित १२ जनालाई नियन्त्रणमा लिएको थियो । त्यसपछि स्थानीय काङ्ग्रेस पार्टी कार्यालयमा आयोजित कार्यक्रममा वरिष्ठ नेता पौडेलले पुल उद्घाटन कार्यक्रममा सहभागी हुन जाने क्रममा नियन्त्रणमा लिइएकोमा आपत्ति जनाउँदै भने- ‘तनहुँमा भएको घटनाप्रति देशभर निन्दा भइरहेको छ, उक्त घटनाको जति विरोध गरे पनि कम हुन्छ ।’

प्रहरी शक्तिको दुरुपयोग गरी काङ्ग्रेसलाई निषेध गर्न खोजिएको भनी नेता पौडेलले आपत्ति जनाए ।

यस्तै, नेपाल विद्यार्थी सङ्घले पार्टी वरिष्ठ नेता पौडेललाई प्रहरीले नियन्त्रणमा लिएको भन्दै राजधानीमा विरोध प्रदर्शन गरेको छ । नेविसङ्घ केन्द्रीय समितिले बुधबार साँझ काठमाडौंको माइतीघरमा गरेको प्रदर्शनपछिको सभामा अध्यक्ष राजीव ढुङ्गानाले पौडेललाई पक्राउ गरेर सरकारले निषेधको राजनीति गरेको आरोप लगाए ।

नेविसङ्घका महामन्त्री उर्मिला थपलिया र युवराज पाण्डे, नेता बलदेव तिमल्सिनालगायतले वरिष्ठ नेतालाई नियन्त्रणा लिएको घटनाको निन्दा गर्दै घटनामा संलग्नलाई कारबाही गर्न माग गरे ।

जिल्ला काङ्ग्रेस तनहुँले बुधबार भएको घटनाको विरोध गर्दै बिहीबार बिहान ११ बजे बैठक बसेर थप आन्दोलनका कार्यक्रम घोषणा गर्ने जनाएको छ । काङ्ग्रेस जिल्ला कार्यवाहक सभापति आलेले घटनाको निन्दा गर्दै आन्दोलन शुरु गरिने घोषणा गरेका हुन् ।

बुधबार अपराह्न प्रहरीसँग भएको झडपमा संविधानसभाका तत्कालीन सदस्य रामचन्द्र पौडेल, जिल्ला सचिव लक्ष्मी आचार्य, नेपाल ट्रेड युनियन काङ्ग्रेसका अध्यक्ष सूर्यचन्द्र हड्खले, नेपाल महिला सङ्घका सभापति पवित्रा पौडेल र महासमिति सदस्य रामचन्द्र अधिकारी घाइते भएको काङ्ग्रेसले जनाएको छ ।

पूर्वाधार विकास कार्यालयमार्फत सम्पन्न भएको पुलको उपभोक्ता समितिले उद्घाटनको कार्यक्रम राखेपछि कार्यालयले पत्र काटेर कार्यक्रम स्थगन गर्न आग्रह गरेको बताइन्छ । उपभोक्ता समितिले वरिष्ठ नेता पौडेललाई प्रमुख अतिथि बनाएपछि नेकपानिकट युवा सङ्घले सोही पुलमा बिहान विरोधसभा आयोजना गरेको थियो ।

दुवै पक्षबीच झडप हुन सक्ने सम्भावनालाई ध्यानमा राखी जिल्ला प्रशासन कार्यालयले मध्याह्न १२ बजेदेखि साँझ ६ बजेसम्म सो क्षेत्रमा निषेधाज्ञा जारी गरेको थियो । वरिष्ठ नेता पौडेल काङ्ग्रेस कार्यकर्तासहित पुल भएको स्थानमा जान खोजेपछि प्रहरीले रोकेको थियो । सोही क्रममा प्रहरी र काङ्ग्रेस कार्यकर्ताबीच झडप भएको थियो ।

सो पुलको बिहीबार बिहान ११ बजे वरिष्ठ नेता रामचन्द्र पौडेलबाटै उद्घाटन गरिने कार्यक्रम रहेको नेपाली कांग्रेसका प्रवक्ता विश्वप्रकाश शर्माले जनाएका छन् ।