काठमाडौंको नक्सालमा रहेको क्राउन प्लाजा होटलको कोठामा जलेर एक महिलाको मृत्यु भएको छ । होटलको कोठामा जलेकी २३ वर्षीया महिलाको उपचारका क्रममा मङ्गलबार कीर्तिपुर अस्पतालमा निधन भएको हो । यस घटनालाई शङ्कास्पद रूपमा लिइएको छ ।
जिल्ला प्रहरी परिसर काठमाडौंका प्रवक्ता प्रहरी उपरीक्षक दिनेशराज मैनालीले महिलाको मृत्युबारे छानविन गर्न मङ्गलबार नै दुई जनालाई पक्राउ गरी अनुसन्धान भइरहेको जानकारी दिएका छन् ।
पक्राउपर्नेमा होटलका कर्मचारी पवनकुमार श्रेष्ठ र महिलासँगै होटलमा बस्न गएका केशव रिजाल रहेका छन् ।
महिला होटलमा जलेर गम्भीर घाइते भए पनि होटलले प्रहरीलाई खबर नगरी अस्पताल लगेकाले घटना शङ्कास्पद भएको प्रहरीको भनाइ छ । आवश्यक अनुसन्धान गर्न प्रहरीले उनीहरुलाई पक्राउ गरेको हो । पक्राउ परेका दुवै जनालाई जिल्ला अदालत काठमाडौंबाट पाँच दिनको म्याद थप गरी अनुसन्धान भइरहेको प्रवक्ता मैनालीले जनाएका छन् ।
प्रतिक्रिया