रुसी विपक्षी नेता एलेक्सी नभाल्नीले आर्कटिक सर्कलभन्दा बाहिरको पेनल कोलोनीमा २० दिनको ‘अत्यन्त थकाउने’ स्थानान्तरणपछि आफू ‘ठिक’ रहेको बताएका छन् ।

दुई साताभन्दा बढी समयदेखि अज्ञात अवस्थामा रहेका क्रेमलिनका आलोचक नभाल्नी अहिले रुसको सुदूर उत्तरमा रहेको पेनल कोलोनीमा रहेका र वकिलसँग भेट भएको उनका समर्थकहरूले बताएका छन् । ‘मेरा बारेमा चिन्ता नलिनुहोस्, म ठिक छु, अन्ततः यस्तो गरेकामा मैले पूर्णरूपमा आराम गरिरहेको छु’, उनले जाडोका कपडा र दारीलाई उल्लेख गर्दै सामाजिक सञ्जाल एक्समा लेखेका छन्, ‘सान्ता क्लजका लागि जस्तै म अहिले पनि राम्रो मनस्थितिमा छु ।’

अमेरिकी विदेश मन्त्रालयले नभाल्नीको स्वास्थ्य र उनको अनुचित नजरबन्दको अवस्थाप्रति गहिरो चिन्तित बनाएको बताएको छ ।

विष दिएर हत्या गर्ने प्रयासबाट बचेपछि सन् २०२१ मा कारागार जानुअघि नभाल्नीले व्यापक स्तरको सरकार विरोधी प्रदर्शन गरेका थिए । उनले आफ्नो हिरासतको अधिकांश समय मस्कोबाट करिब दुई सय ५० किलोमिटर पूर्वमा रहेको भ्लादिमिर क्षेत्रमा आइके-५ पेनल कोलोनीमा बिताएका छन् ।

अगस्टमा एक अदालतले चरमपन्थीको आरोपमा उनको सजायलाई १९ वर्षसम्म बढाउँदै उनलाई सामान्यतया विशेषरूपमा खतरनाक कैदीहरूलाई राखिने कठोर ‘विशेष शासन’ कारागारमा राख्ने फैसला गरेको थियो । उनको अघिल्लो हिरासतमा राखिएको स्थानको विशेषता भनेको कुनै पनि पत्र इमेलको सट्टा नियमित हुलाक सेवामार्फत नभाल्नीसम्म पुग्न धेरै समय लाग्नेछ ।

कतिपयले उनको स्थानान्तरण रुसमा आगामी राष्ट्रपति निर्वाचनसँग जोडिएको हुनसक्ने आशंका प्रकट गरेका छन् । नभाल्नीले एक्समा उनी शनिबार खार्प गाउँमा आर्कटिक पेनल कोलोनी आइपुगेको र सोमबार आफ्ना वकिलसँग भेट गरेको बताएका छन् । सोभियत कालमा कैदीहरूलाई टाढा टाढाका स्थानमा रेलमार्फत लगिने गरेकाले रुसमा कैदीहरूको स्थानान्तरणमा धेरै साता लाग्न सक्छ ।

‘मैले जनवरीको मध्यअघि कसैले मलाई यहाँ भेट्टाउने अपेक्षा गरेको थिइनँ’, उनले लेखेका छन् । उनले बरफले ढाकिएको सेलबाहेक वरपर केही नदेखेको बताएका छन् । ‘दुर्भाग्यवश त्यहाँ कुनै बाह्रसिंगा छैनन् तर ठूला र सुन्दर गोठाला कुकुर छन्’, उनले भनेका छन् ।

आगामी दिनमा खार्पमा तापक्रम शून्यदेखि माइनस २६ डिग्री सेल्सियससम्म पुग्ने अनुमान गरिएको छ ।