नक्कली भुटानी शरणार्थी प्रकरणमा मुछिएर पुर्पक्षका लागि कारागार चलान भएका भुटानी शरणार्थी नेता टेकनाथ रिजाल अदालतको आदेशपछि धरौटी बुझाएर रिहा भएका छन् । उक्त मुद्दामा सात महिना हिरासतमा बस्नुभएका नेता रिजाल धरौटी बुझाएर बुधबार रिहा भएका हुन् ।

भुटानी नेता रिजाललाई उच्च अदालत पाटनले गत मङ्सिर १५ मा १५ लाख धरौटीमा छाड्न आदेश दिएको थियो । तर धरौटी रकम बुझाउन नसक्दा उनी सुन्धारा कारागारमै रहेका थिए ।

उनका सहयोगी विश्वनाथ क्षेत्रीले जानकारी दिएअनुसार रिहाइपछि रिजालले आफ्नो पक्षमा सहयोग गर्ने सबैलाई धन्यवाद दिएका छन् । धरौटीको रकम बुझाउन नसक्दा उनी आदेश आएपछि पनि झण्डै एक महिना कारागारमा रहनुपरेको थियो ।

काठमाडौं जिल्ला अदालतमा गत आइतबार बेलुकी धरौटी रकम बुझाएका उनी सोम र मंगलबार बिदा परेकोले बुधबारमात्रै रिहा भएका हुन् । अब यही पुस २० गते उनी काठमाडौं जिल्ला अदालतमा उपस्थित हुनुपर्नेछ ।

शरणार्थी प्रकरणमा पुर्पक्षका लागि जेल परेका पूर्वगृहमन्त्री बालकृष्ण खाण उच्चको आदेशअनुसार जिल्ला अदालतमा ३० लाख र सम्पत्ति शुद्धीकरण विभागमा १५ लाख रुपैयाँ बुझाएर रिहा भएका छन् । यस्तै, पूर्वउपप्रधानमन्त्री टोपबहादुर रायमाझीका छोरा सन्दीप, आरोपी नरेन्द्र केसी, हरिभक्त महर्जन, शमशेर मियाँ र रामशरण केसीले पनि तोकिएको रकम बुझाएर रिहा भइसकेका छन् ।

उक्त प्रकरणमा पूर्वसचिव टेकनारायण पाण्डे, पूर्वउपप्रधानमन्त्री रायमाझी, इन्द्रजीत राईलगायत भने पुर्पक्षका लागि कारागारमा नै छन् ।

_{^{file photo}}