प्रमुख प्रतिपक्षी नेपाली कांग्रेस संसदीय दलका नेता भीष्मराज आङ्देम्बेले जलनबाट घाइते मुगुका युवा गणेश नेपालीको निधन भएको घटनाबारे छानबिन गर्न माग गरेका छन् ।

दिवङ्गत नेपालीलाई श्रद्धाञ्जली दिन आज (२६ असार) चिकित्सा विज्ञान प्रतिष्ठान (वीर अस्पताल) पुग्नुभएका नेता आङ्देम्बेले काम गरेर खाने एक युवालाई उचित वातावरणको अभाव हुँदा यस्तो घटना हुन पुगेको जिकिर गर्नुभयो । उनले यसबारे सरकार गम्भीर भइ विगतदेखि नै भएका यस्ता घटनाको छानबिन गर्नुपर्नेमा जोड दिए ।

नेपालीको निधनको घटना विडम्बनापूर्ण : एमाले

नेपाल कम्युनिष्ट पार्टी (एमाले)ले जलनबाट घाइते भइ निधन भएका गणेश नेपालीको घटना विडम्बनापूर्ण भएको टिप्पणी गरेको छ ।

एमालेका महासचिव शङ्कर पोखरेलले जारी गरेको विज्ञप्तिमा आधारभूत वर्गका जनतालाई संरक्षण दिनुपर्ने राज्य आफैं निमुखा नागरिकको गाँस र बास खोस्न उद्यत हुनु अत्यन्तै विडम्बनापूर्ण र निन्दनीय विषय भएको जनाइएको छ ।

वक्तव्यमा मृतक नेपालीप्रति भावपूर्ण श्रद्धाञ्जली अर्पण र शोकाकुल परिवारप्रति समवेदना व्यक्त गर्दै दुःखद् घटनाको निष्पक्ष छानबिन गरी दोषीहरूलाई कडा कानुनी कारबाही गर्न र पीडितपरिवारलाई उचित क्षतिपूर्ति दिन सरकारसँग माग गरिएको छ ।