नागढुङ्गा-नौबिसे सडकको जाम छल्न काठमाडौंको सीतापाइलाबाट धादिङको धार्के पुगिने वैकल्पिकमार्ग आज (४ कात्तिक)देखि अनिश्चितकालका लागि बन्द गरिएको छ ।

धार्के-ठूलोखोलामा दोस्रो तहको कालोपत्र आजदेखि सुरु भएकाले अर्को सूचना जारी नभएसम्मका लागि सडक बन्द गरिएको धुनीबेँसी नगरपालिका-५ का वडाअध्यक्ष विशाल भट्टराईले जानकारी दिएका छन् । ‘आजदेखि धार्के-ठूलोखोला खण्डमा दोस्रो लेयरको कालोपत्र सुरु भएको छ । अत्यावश्यक बाहेकका सवारी साधनलाई बन्द गरिएको हो’, उनले भनेका छन् ।

उक्त सडकअन्तर्गत हाल धुनिबेसी नगरपालिका-५ को बट्टारबाट अमलेश्वरी पार्कसम्म कालोपत्र भइरहेको सडक निर्माणको ठेक्का लिएको कम्पनी गोरखकाली कन्स्ट्रक्सनका साइट इन्चार्ज रामचन्द्र न्यौपानेले जानकारी दिए । उनले भनेका छन्, ‘हामीले नौ किलोमिटरको उक्त दोस्रो लेयरको कालोपत्र तीन चरणमा पूरा गर्नेगरी तीनरतीन किमीका दरले काम गर्नेछौँ, तिहारसम्म आधा काम सकिन्छ ।’

यस पटकको दशैँमा सवारी जामका कारण नागढुङ्गा-नौबिसे सडकको सट्टा सीतापाइला-धार्के सडक प्रयोगमा ल्याइएको थियो । अधिकांश साना सवारी साधन सीतापाइला-धार्के हुँदै गुडेका थिए । नागढुङ्गा-नौबिसे सडकको जाम छल्न यातायात व्यवसायीले दशैँमा उक्त सडक प्रयोग गरेको काठमाडौं उपत्यका ट्राफिक प्रहरी कार्यालयका प्रमुख एवं प्रहरी नायब महानिरीक्षक भरतबहादुर बोहराको भनाइ छ ।

नागरिक स्तरबाट सडक स्तरोन्नतिको माग बढेपछि सरकारले उक्त सडकको काठमाडौंतर्फ पाँच किलोमिटर सडक विस्तार सुरु गरिसकको छ । सीतापाइला-धार्के सडक कुल २४ किलोमिटर लम्बाइ र सीतापाइला-रामकोट-भीमढुङ्गा-महेशफाँट हुँदै धार्केमा जोडिने भौतिक पूर्वाधार तथा यातायात मन्त्रालयका सहसचिव सुशीलबाबु ढकालले जानकारी दिए ।