इजाजतप्राप्त धितोपत्र दलाल (स्टक ब्रोकर) कम्पनी ‘साउथ एसियन बुल्स प्रा.लि.’ले लगानीकर्ता सचेतना कार्यक्रम सम्पन्न गरेको छ । काठमाडौंस्थित अपोलो इन्टरनेशनल कलेज मा २०८३ असार २९ गते तथा ललितपुरस्थित पिनाकल एकेडेमी मा २०८३ असार ३१ गते सम्पन्न कार्यक्रमको सहजीकरण बेटा एनालिटिक्स प्रा. लि. ले गरेको थियो ।

एपोलो इन्टरनेशनल कलेजमा बीबीए, बीबीएम तथा बीबीएस कार्यक्रमका ७० भन्दा बढी विद्यार्थीहरूको सहभागिता रहेको थियो भने पिनाकल एकेडेमीमा ८० भन्दा बढी विद्यार्थीहरूले कार्यक्रममा सहभागिता जनाएका थिए ।

एपोलो इन्टरनेशनल कलेजमा आयोजित कार्यक्रमका स्रोतव्यक्ति सञ्जीव घिमिरे रहेका थिए भने पिनाकल एकेडेमीमा विक्रम चित्रकारले प्रशिक्षण दिएका थिए । उनीहरूले वित्तीय साक्षरता, लगानी योजना, जोखिम तथा प्रतिफलको मूल्याङ्कन, पूँजी बजारमा सूचित निर्णयको महत्व, दीर्घकालीन सम्पत्ति सृजनामा शेयर बजारको भूमिका तथा लगानी गर्दा ध्यान दिनुपर्ने विभिन्न पक्षहरूबारे विस्तृत जानकारी प्रदान गरेका थिए ।

कार्यक्रममा साउथ एसियन बुल्स प्रा. लि. का प्रतिनिधिहरू, जसमा अपरेशन हेड तथा कम्प्लायन्स अफिसर समेत सहभागी थिए, ले कम्पनीका सेवा, स्टक ब्रोकरको कार्यप्रणाली, लगानीकर्ता सहायता प्रणाली तथा नेपालको पूँजी बजारमा ब्रोकर कम्पनीहरूको भूमिकाबारे जानकारी दिएका थिए ।

कार्यक्रमका क्रममा पिनाकल एकेडेमीका अध्यक्ष सरोज न्यौपाने एवम् एपोलो इन्टरनेशनल कलेजका कार्यकारी निर्देशकले यस्ता कार्यक्रमले विद्यार्थीहरूमा वित्तीय तथा लगानी सम्बन्धी चेतना अभिवृद्धि गर्न महत्वपूर्ण योगदान पुऱ्याउने विश्वास व्यक्त गर्दै कार्यक्रमप्रति खुशी व्यक्त गरे । साथै, उनीहरूले स्रोत व्यक्तिहरू तथा साउथ एसियन बुल्सका प्रतिनिधिहरूलाई सम्मानस्वरूप मायाको चिनो प्रदान गरेका थिए ।

कार्यक्रममा विद्यार्थीहरूको उत्साहजनक सहभागिता रहेको थियो भने अन्त्यमा अन्तरक्रियात्मक प्रश्नोत्तर सत्रसमेत सञ्चालन गरिएको थियो । साउथ एसियन बुल्स प्रा. लि. ले कार्यक्रम सफल बनाउन सहयोग पुऱ्याउने एपोलो इन्टरनेशनल कलेज र पिनाकल एकेडेमीप्रति आभार व्यक्त गर्दै नेपालभरका युवा तथा सम्भावित लगानीकर्तामाझ लगानीकर्ता शिक्षा र वित्तीय साक्षरता प्रवद्र्धन गर्ने आफ्नो प्रतिबद्धता पुनः दोहोऱ्याएको छ ।