‘छठ’का व्रतालुहरुले उदाउँदो सूर्यलाई अघ्र्य दिइ पर्वको समापन गरेका छन् ।मूल विधि चतुर्थीदेखि शुरू भई षष्ठीका दिन बेलुकी अस्ताउन लागेको र सप्तमीका दिन उदाउँदो सूर्यलाई अघ्र्य दिएर पूजाअर्चना गरी यो पर्वको समापन गर्ने परम्परा रहेको छ ।

छठको अवसरमा सूर्यलाई दिइने अर्घमा ठकुवालाई समृद्धि, उखुलाई आरोग्य, केरालाई विष्णु र कृषि उत्पादनलाई प्रकृतिप्रति कृतज्ञताको द्योतक मानिन्छ । अर्घमा ठकुवा, कसार, केरा, उखु, मेवा मिष्ठान्न, गेडागुडी र विभिन्न वनस्पति, भुसवा, माटोको हात्ती, सुप, कनसुपती, कलशसहितको घैँटो सूर्यलाई अर्पण गर्ने चलन रहेको छ ।

महिलाको अगुवाइमा समाज र परिवारको हितका लागि संकल्प गरिनु नै छठ पर्वको महत्वपूर्ण पक्ष मानिन्छ भने अस्ताउने र उदाउने दुइटै सूर्यलाई अभिनन्दन गर्नुको अर्थ जीवनमा सुखदुःख, रोदन र हाँसोलाई समान रूपमा र जीवनकै पाटोका रूपमा लिइनु हो भन्ने जानिफकारहरुको भनाई छ ।

विशेषगरी तराई मधेसमा अत्यन्त उल्लास उमंगका साथ मनाइने छठ पछिल्ला वर्षमा आएर मुलुकभर र खासगरी राजधानी काठमाडौंमा पनि उत्तिकै श्रद्धा र उमंगपूर्वक मनाइन थालिएको छ । यसै अवसरमा विहिबार काठमाडौंको गौरीघाटमा सूर्यलाई अर्घ दिई छठ मनाइएको दृश्य छविकार प्रविण श्रेष्ठका क्यामेरामा यसरी कैद भएका छन् ।