राजधानीमा तरकारीको मूल्य उच्च बन्दै गएको छ । मागअनुसार तरकारी आपूर्ति हुन नसकेपछि तरकारीको मूल्य दोब्बरले बढेको हो । दसैं र तिहारपछि तरकारी आपूर्तिमा ५० प्रतिशतले कमी आएको कालिमाटी तरकारी बजारका व्यापारीहरु बताउछन् ।

यतिबेला सर्वसाधारणको भान्सादेखि उपत्यकाको पाँचतारे होटलसम्म दैनिक उपभोगमा आउने आलु, प्याज, टमाटर, काउलीलगायत तरकारीको मूल्य दसैंअघिको तुलनामा दोब्बरले बढेको छ ।

कालीमाटी फलफूल तथा तरकारी विकास समितिका एक अधिकारीले सामान्यतया काठमाडौंमा दैनिक सात सय मेट्रिक टन तरकारी आपूर्ति हुने गरेको भएपनि अहिले त्यसको ५० प्रतिशतमात्रै आपूर्ति भएकाले मूल्य उच्च बनेको बताए ।

आज थोक मूल्यमा सानो गोलभेंडा प्रतिकेजी ७८ रुपैयाँ भए पनि बजारमा एक सय २० रुपैयाँ छ । गत वर्ष कात्तिकमा सानो गोलभेंडाको सरदर मूल्य ३७ रुपैयाँ किलो थियो ।

प्याज प्रतिकेजी थोक मूल्य ६७ रुपैयाँ रहेकोमा खुद्रा बजारमा एक सयभन्दा माथि रहेको उपभोक्ता बताउँछन् । गत वर्ष कात्तिकमा प्याजको सरदर मूल्य २३ रुपैयाँ किलो थियो । थोक मूल्यमा आलु ४४ रुपैयाँ किलो छ । तर, बजारमा ७० देखि ८० रुपैयाँको हारहारीमा बिक्री हुँदै आएको छ ।

गाँजर प्रतिकेजी ९२ रुपैयाँ छ । बन्दा ६८ रुपैयाँ छ । यसको मूल्य अघिल्लादिनको तुलनामा २० प्रतिशतले बढेको व्यवसायी बताउँछन् ।

तरकारीको थोक र खुद्रा मूल्यको अन्तरको यो एउटा सामान्य उदाहरण मात्र हो । सबैजसो तरकारीको खुद्रा मूल्य व्यवसायी आफैंले निर्धारण गर्दा पनि उपभोक्ता ठगिएका छन् । खुद्रा व्यापारीको मनलाग्दी मूल्य निर्धारणले उपभोक्ता महँगीको मारमा परेका छन् ।

थोकमा किनेको तरकारीको मूल्य खुद्रा व्यवसायीले बेच्दा बढीमा २० प्रतिशत नाफा खानुपर्ने हुन्छ । तर व्यवसायीले मनलाग्दी लिने गरेका छन् ।

आजको मूल्यसुची..