खिल्हो अर्थात कुकुर बर्गको स्वागतमा लमजुङका गुरुङ समुदायले ल्होसार भब्यताका साथ मनाइरहेका छन् । गाउँशहर तथा टोलटोलमा ल्होसारको रमझम जारी छ ।

पुस १५ गतेको ल्होसारको मुख्य कार्यक्रम सकिएपनि टोलटोलमा ल्होसार मनाउने कार्यक्रम जारी छ । बेसीशहरको मनाङे चौतारा टोल, शान्ति टोल र शेरा टोलमा आइतबार ल्होसार मनाइएको छ । दिनभरी नाचगान गरी टोलका स्थानीय एक आपसमा भेला भएर स्योकैं अर्थात सामूहिक भोज खाएका थिए ।

गुरुङ समुदायका गन्यमान्यलाई समेत आमन्त्रण गरेर गुरुङ समुदायले टोलटोलमा स्योकैं अर्थात सामूहिक भोज खाएका हुन् । स्योकैं कार्यक्रमका लागि टोलटोलमा संगसंगै खाने र संगसैगै नाचगान भएको थियो । जिल्लाका विभिन्न गाउँबाट आएर स्थायी वा अस्थायी रुपमा बसोबास गर्ने गुरुङ समुदाय बेंसीसहरका ५ वटा टोलमा आवद्ध छन् ।

मनाङे चौतारा टोलको आयोजनामा भएको स्योकैं अर्थात ल्होसार कार्यक्रममा ल्होसारको अवसरमा आयोजित कविता प्रतियोगितामा प्रथम स्थान हासिल गर्न सफल कविता सुनाइएको थियो । टोलका सल्लाहकार क्याप्टेन मिलबहादुर गुरुङले दिनभरी टोलका ब्यक्तिहरु संगसंगै जुटेर नाचगान गरी रमाइलो गरिएको र स्योकैं खाएको बताए ।

उनले विभिन्न खेलकूदका कार्यक्रमहरु समेत आयोजना गरिएको र १५ गते आयोजना गरिएको नृत्य प्रतियोगितामा सहभागिको नृत्य समेत प्रदर्शन गरिएको बताए । उक्त कार्यक्रममा भुजुङका समाजसेवी रामबहादुर गुरुङ लगायतको उपस्थिति रहेको थियो ।

शान्तिटोल बाबासमूहका अध्यक्ष क्याप्टेन फमबहादुर गुरुङका अनुसार दिनभरी स्योकैं खाएर नाचगान गरी ल्होसार मनाइएको बताए । यसपटक टोलका धेरै ब्यक्तिहरुको निधन भएको र केही दिनअघि सवारी दुर्घटनामा परेर टोलकै एक ब्यक्तिको निधन भएपछि यसपटक मासुजन्य पदार्थको प्रयोग नगरेको बताए । उनले यसपटक हुर्सोल्लासका साथ ल्होसार र स्योकैं कार्यक्रम मनाएको बताए ।