अप्ठ्यारो परिस्थितिलाई हतियार बनाएर स्वार्थ सिद्धि गर्ने प्रवृत्ति उजागर गर्दै यातायात व्यवसायीले फेरि पनि सरकारलाई झुकाएका छन् । कानुनविपरीत बसमा छत राखेर यातायात सञ्चालन गर्न पाउनुपर्ने अडान तेस्र्याउँदै दशैंको अग्रिम टिकट बुकिङ रोक्दै आएका बस व्यवसायीको दबाबमा सरकारले सो माग पूरा गरिदिएको छ ।

छतमा समेत यात्रु चढाएर ओभरलोड गर्दा दुर्घटना बढेर यात्रुको ज्यान जाने घटना बढेपछि कानुनी तवरमै छतमा यात्रु राख्न रोक लगाइएको थियो । तर, यात्रुको सामान राख्न असुविधा पुगेको बहाना बनाएर असन्तुष्टि जनाउँदै आएका व्यवसायीले दशैंको मुखमा आएर टिकट बुकिङ रोकी सरकारसँग बार्गेनिङ गरेका थिए ।

भौतिक पूर्वाधार तथा यातायात मन्त्रालयमा शनिबार भएको छलफलपछि दशैँमा लामो रुटमा यात्रा गर्ने यात्रुका लागि २७ भदौ मंगलबारदेखि टिकट बुकिङ खुल्ला गर्ने सहमति जुटेको हो । मन्त्री, राज्यमन्त्री, यातायात व्यवस्था विभागका महानिर्देशक र यातायात व्यवसायीको बैठकमा बसमा छत राख्न दिने सहमति गरिएको छ ।

बैठकमा मन्त्री वीरबहादुर बलायरले बिग्रेको सडक मर्मत गरेर यातायात सञ्चालन गर्न सकिने तर भाडा बढाउन नसकिने अडान राखेका थिए । भाडा बढाउनुपर्ने तर्क व्यवसायीले पनि राखेनन्, उनीहरुको अडान त बसमा छत जडान गर्न पाउनुपर्ने विषयमा थियो ।

सहमतिअनुसार लामो दूरीमा यात्रा गर्ने यात्रुको सामान छतमा राख्न दिए पनि खसी, बोकालगायत यात्रु छतमा राखे ट्राफिक प्रहरीले कारबाही गर्ने सहमति भने भएको छ । सो बैठकमा मन्त्री बलायरका अलावा राज्यमन्त्री सीता गुरुङ, विभागका महानिर्देशक रुपनारायण भट्टराई, नेपाल यातायात व्यवसायी राष्ट्रिय महासंघका कावा अध्यक्ष दोलनाथ खनाल र महासचिव सरोज सिटौला सहभागी थिए । व्यवसायी सिटौला खरो रुपमा प्रस्तुत भएका र उनको तर्क काट्न सरकारी प्रतिनिधिहरुलाई हम्मे हम्मे परेको बताइन्छ ।