जिल्ला कारागार खोटाङमा कैद भुक्तान गरिरहेका एक कैदीको सुतेकै अवस्थामा मृत्यु भएको छ । सवारी ज्यान मुद्दामा दिक्तेलस्थित जिल्ला कारागार मुडेमा कैद भुक्तान गरिरहेका साकेला गाउँपालिका-४ मात्तिम पारुङका २३ वर्षीय निसान राईको मृत्यु भएको हो ।

असार ३० गते बेलुकाको खाना खाएपछि सुतेका राई मध्यराति बेहोस अवस्थामा भेटिएको कारागारका सूचना अधिकारी कपिन्द्र कठायतले जानकारी दिएका छन् । बेहोस अवस्थामा भेटिएपछि उनलाई राति नै जिल्ला अस्पताल पुऱ्याइएकामा अस्पतालले तत्कालै मृत घोषणा गरेको थियो । अस्पताल ल्याइपुऱ्याउँदा कैदीको मृत्यु भइसकेको जनाउँदै अस्पतालका डा. पुष्कल राईले भने, ‘मृत्युको कारण खुलेको छैन, शव परीक्षणपछि मात्रै थाहा हुन्छ ।’

मृतक राई सवारी ज्यान मुद्दामा दुई वर्षका लागि जेल परेका थिए । जरिवाना तिरेको खण्डमा उनी आगामी साउन ११ गते जेलमुक्त हुनसक्ने अवस्था रहेको थियो ।